Prezidentimiz tomonidan umumta’lim maktablari o‘quvchi-yoshlarini "Hayot maktabi"ga tayyorlash, bitiruvchilar maktabni 2 ta xorijiy tilni o‘zlashtirgan holda kamida bitta hunarni o‘rganib, tamomlashlari yuzasidan bir qator tashabbuslar ilgari surilgan edi.

Ushbu tashabbuslarni maktablarda joriy etish maqsadida  viloyat hokimi o‘rinbosari N.Mo‘minov va viloyat xalq ta’limi boshqarmasi boshlig‘i G.Omonovalar Shahrixon va Asaka tumanlarida faoliyat olib borayotgan chet tili o‘qituvchilari bilan ochiq muloqot o‘tkazdilar. 

Uchrashuvda bugungi kunda kamida 2 ta xorijiy tilni bilish zaruriyatga aylanayotganligi, mehnat bozorlarida chet tillarini o‘zlashtirgan kadrlarga bo‘lgan talab yuqoriligi, shu sababli maktablarda xorijiy tillarni samarali o‘qitish bugungi kunning eng ustuvor vazifasi ekanligi ta’kidlandi. 

Muloqot asnosida kun tartibidagi ushbu muhim masala yuzasidan o‘qituvchi-murabbiylarning taklif va fikr-mulohazalari tinglandi.